Toshkent davlat iqtisodiyot universiteti va Imom Buxoriy xalqaro ilmiy-tadqiqot markazi vakillari hamkorligida “Jaholatga qarshi maʼrifat” mavzuidagi ilmiy seminar tashkil etildi hamda Imom Buxoriy xalqaro ilmiy-tadqiqot markazida nashr etilgan yangi kitoblar taqdimoti o‘tkazildi.
Imom Buxoriy xalqaro ilmiy tadqiqot markazi direktori Bosh maslahatchisi, professor B.To‘rayev va ilmiy xodim S.Abduvoyitov bugungi kunda O‘zbekistonda allomalarimiz merosi chuqur tadqiq etilib, bu borada ilmiy risolalar muntazam chop etilayotgani haqida fikrlar bildirdilar va yangi nashr etilgan “Sahihi Buxoriy sharhi”, “Musnadi Keshiy”, Imom Dorimiyning “Sunani Dorimiy”, Abu Mansur Moturidiyning “Taʼvilot Al-Qurʼon” asarlari taqdimotini o‘tkazdilar.
Ilmiy seminarda professorlar I.Saifnazarov, B.Aliyev A.Muxtorov yangi nashr etilgan kitoblar samarali mehnat natijasi ekanligini taʼkidlab, unda ilgari surilgan diniy-falsafiy qarashlar, chuqur tahliliy yondashuvlar, aniq manbalarga tayangan holda yaratilganini va ushbu kitoblar o‘quvchi tafakkurining yana-da oshishiga xizmat qilishi bilan ahamiyatli ekanligini taʼkidlab o‘tdilar.
Tadbir yakunida ushbu kitoblarning oliy taʼlim muassasalarida chuqur o‘rganilishi, o‘qituvchilar tomonidan darslik sifatida foydalanilishi tavsiya etildi.
