Toshkent davlat iqtisodiyot universitetida TDIU va Indoneziya qo‘shma ta’lim fakultetinining sumalak sayli o‘tkazildi. Unda universitet rahbariyati, qo‘shma ta’lim dasturi jamoasi, universitet talabalari hamda Indoneziyaning Pendidikan universiteti professorlari ishtirok etdi.
Tadbirni TDIU rektori professor To‘lqin Teshabayev kirish so‘zi bilan ochib berdi va bahor ayyomi, yaqinlashib kelayotgan muborak Ramazon Hayiti bilan barchani muborakbod etib, eng yaxshi tilaklarini bildirdi. Qolaversa, bugungi kunda oliy ta’lim tizimida qo‘shma ta’lim dasturlarining ahamiyati, undagi ta’lim sifatiga alohida to‘xtalib o‘tdi.
Milliy qadriyatlar, urf-odat va an’analar aks etgan mazkur sayl “Tadbirkor ayollar davra suhbati”, “Ochiq osmon ostida picnik”, “Milliy laparlar bellashuvi”, “Milliy sport o‘yinlari”, “Movie time”, “Zakovat” intellektual o‘yini, “Osh chempionati”, “Eng mazali kabob”, “Liboslarda milliy qadriyatlar” singari tadbirlarni o‘z ichiga oldi.
Doshqozonda sumalak qaynatilib, osh damlandi. Xalq e’tiboridagi san’atkorlar hamda universitet iqtidorli talabalari ishtirokida konsert dasturi o‘tkazildi.
